प्रधामन्त्री कप एकदिवसीय राष्ट्रिय क्रिकेट प्रतियोगितामा नेपाल पुलिस क्लबले कीर्तिमान योगफल तयार गरेको छ।
मंगलबार माथिल्लो मुलपानी मैदानमा पुलिसले प्रधानमन्त्री कप इतिहासकै सर्वाधिक स्कोर बनाउने क्रममा ९ विकेटको क्षतिमा ३५५ रन बनाएको हो।
पुलिसले सशस्त्र प्रहरी बलको एपिएफ क्लबविरूद्ध यो कीर्तिमानी स्कोर खडा गर्दै एपिएफकै नाममा रहेको आठ वर्ष पुरानो कीर्तिमान भंग गर्यो। यसअघि एपिएफले मधेश प्रदेशविरूद्ध ३३९ रन बनाएको थियो।
टस जितेको एपिएफले फिल्डिङ रोजेपछि पहिले ब्याटिङ गरेको पुलिसका लागि चार ब्याटरले अर्धशतक प्रहार गरे।
ओपनिङ ब्याटर दिनेश खरेलले ५२ बलमा ६ चौका र ४ छक्काको मद्दतमा ६० रन बनाए। त्यसपछि शंकर रानाले ६१ रनको योगदान गरे। रानाले ५४ बलमा ५ चौका र ४ छक्का प्रहार गरेका थिए।
कप्तान आरिफ शेखले पनि अर्धशतक प्रहार गर्न सफल भए। आरिफले ४२ बलमा ५ चौका र २ छक्काको मद्दतमा ५० रन बनाए।
चौथो अर्धशतक दिलसाद अलीको नाममा रह्यो। दिलसादले ३० बलमा ५ चौका र ३ छक्का हिर्काउँदै नटआउट ५१ रन जोडे।
बलिङमा एपिएफका कमल ऐरी र अमर रौटेलाले २-२ विकेट लिए।
