सप्तरीमा १४ वर्षीया बालिकालाई गर्भवतीपछि बेपत्ता बनाएको भन्दै प्रहरीमा उजुरी परेको छ।
सुरूंगा नगरपालिका-३ का स्थानीय महेश्वर यादवको घरमा बस्दै आएकी १४ वर्षीया बालिका फागुन ३० गतेदेखि हराएको भन्दै प्रहरीमा उजुरी परेको हो।
७/८ वर्षदेखि महेश्वर यादवको घरमा बस्दै आएकी आफ्नी नन्दलाई गर्भवती बनाएपछि उनकै परिवारले बेपत्ता पारेको भन्दै भाउजू रितादेवी सदाले प्रहरीमा उजुरी दिएकी छन्।
रिता देवीले चैत ४ गते इलाका प्रहरी कार्यालय कडरबोनामा उजुरी दिएकी थिइन्।
उनले नन्दलाई झिकाइ सत्यतत्य अनुसन्धान गरी कानुन बमोजिम आवश्यक कारबाही गर्न माग गरेकी छन्।
'नन्द बसेको घरको साहु र उनको छोराविरूद्ध उजुरी दिएको छु,' रिता देवीले भनिन्, 'उनलाई गर्भवती बनाएर पछि बेपत्ता पारिएको सूचना पाएकी छु।'
बालिकालाई ७/८ वर्षदेखि महेश्वरको घरमा बसेर घरेलु काम राखिएको थियो। बुबा-आमा नभएपछि उनलाई त्यहाँ कामदारको रूपमा राखिएको उनले बताइन्।
बालिका घरमा नदेखिएपछि साहु महेश्वरलाई सोध्न जाँदा आफूलाई थाहा नभएको जानकारी दिएको रिता देवीले उजुरीमा बताएकी छन्। उनी गर्भवती भएकै कारणले लुकाइछिपाई कुनै ठाउँमा लगेर गर्भपतन गराएको हुनसक्ने उनको आशंका छ।
काम गर्न बसेको घरका व्यक्तिले नै गर्भवती बनाएर अहिले बालिकालाई बेपत्ता बनाइएको परिवारको आरोप छ। उनलाई सार्वजनिक गर्न भन्दै रिता देवी र आफन्तहरू प्रहरी कार्यालय अगाडि प्रर्दशनी गरिरहेका छन्।
बालिकाको आफन्तहरूले जिल्ला प्रहरी कार्यालय अगाडि आइतबार प्रदर्शनी गरेका हुन्।
'हामीलाई प्रहरीले अनुसन्धान गर्नका लागि एक साता समय दिनु भन्नुभएको छ, त्यसैले आज केही गरेको छैनौं,' रिता देवीले भनिन्, 'एक सातासम्म केही पत्ता नलागेमा अगाडि बढ्ने संकेत समेत दिनुभएको छ।'
यस बारेमा हामीले जिल्ला प्रहरी कार्यालय सप्तरीलाई पनि सोधेका छौं।
बालिकालाई गर्भवती बनाएपछि बेपत्ता पारिएको भन्दै आएको उजुरी चैत ५ गते दर्ता भएको छ। घटनालाई गम्भीर रूपमा लिएर खोजी तथा अनुसन्धान भइरहेको जिल्ला प्रहरी कार्यालय सप्तरीका डिएसपी डम्बर बहादुर पुरीले जानकारी दिए।
'बालिकालाई खोज्ने काम भइरहेको छ, अहिलेसम्म कतै भेटिएको छैन,' डिएसपी पुरीले भने, 'हामी बालिका र उनी बस्ने घरका मानिससँगै आफन्तहरूलाई खोजी रहेका छौं।'
बालिकाको खोजतलासमा जाँदा उनकी दिदीहरूले लिएर गएको प्रारम्भिक अनुसन्धानमा खुलेको छ। तर उनका दिदीहरू नै प्रहरीको सम्पर्कमा नआएको डिएसपी पुरीले जानकारी दिए।
उनका अनुसार स्थानीयले बालिकालाई उनकै दिदीहरूले लिएर गएको छ भनेका थिए। त्यसपछि उनका दिदीहरूको घरमा प्रहरी पुगेको थियो। प्रहरी जाँदा बालिकाको भिनाजुहरूलाई मात्र भेटिएको थियो।
'बालिकाको दिदी बजार गएको प्रहरीलाई जानकारी दिएका थिए,' उनले भने, 'दोस्रो दिन फेरि प्रहरी जाँदा घरमा कोही पनि भेटिएनन्। हामी उनीहरूलाई खोज्दैछौं।'
बालिका बस्ने घरमा पनि कोही भेटिएको छैन। महेश्वर यादव र उनका छोराहरू काठमाडौंतिर बस्ने गरेको बुझिएको छ। यादवकी श्रीमती र बालिका उक्त घरमा बस्ने गरेको स्थानीयहरूले बताएका छन्।
महेश्वरकी श्रीमती वडा कार्यालयमा कार्यरत छिन्। तर केही दिन आफ्नो उपचारका लागि भनेर कार्यालयबाट बिदा लिएको प्रहरी अनुसन्धानमा खुलेको छ।
'महेश्वरको श्रीमती र बालिका दुवै जना घरमा छैनन्। उनीहरू कहाँ गएका हुन् भनेर हामीले खोजिरहेका छौं,' उनले भने।
बालिकालाई लिएर गएका भनिएका उनका दिदीहरू पनि प्रहरीको सम्पर्कमा छैनन्। बालिका बस्ने घरका कोही सम्पर्कमा आएका छैनन्। त्यसैले यस घटनामा अहिले बालिकासँगै आफन्तहरूको खोजी भइरहेको डिएसपी पुरी बताउँछन्।
'बालिकालाई नभेटिएसम्म यस घटनाबारे आफूहरूलाई केही थाहा हुँदैन। तर भाउजूले गर्भवतीपछि बेपत्ता पारिएको भन्दै उजुरी दिएकी छन्,' डिएसपी पुरीले भने, 'त्यही उजुरीका आधारमा हामीले घटनाबारे अनुसन्धान र खोजी कार्य गरिरहेका छौं।'
