आयरल्यान्डको पुरुष क्रिकेट टोली सन् २०२६ मा एकदिवसीय र टी-२० सिरिजका लागि नेपाल भ्रमणमा आउने भएको छ।
क्रिकेट आयरल्यान्डले सन् २०२६ को आफ्नो व्यस्त अन्तर्राष्ट्रिय कार्यतालिका सार्वजनिक गर्दै नेपाल भ्रमणको योजना सुनिश्चित गरेको हो।
आयरल्यान्ड र नेपालबीच हुन लागेको यो सिरिज दुई देशबीचको नयाँ 'पाँच वर्षे रणनीतिक साझेदारी' को हिस्साको रूपमा रहनेछ।
यस साझेदारीले नेपाली क्रिकेटको विकास र दुई देशबीचको खेल सम्बन्धलाई नयाँ उचाइमा पुर्याउने अपेक्षा गरिएको छ।
सार्वजनिक तालिका अनुसार आयरल्यान्डको पुरुष टोलीले सन् २०२६ को अगस्टमा घरेलु मैदानमा अफगानिस्तानसँग पाँच खेलको एकदिवसीय सिरिज खेलेपछि नेपालको भ्रमण गर्नेछ।
नेपालमा हुने यो सिरिज 'ह्वाइट बल' संरचनामा हुनेछ, जसमा टी-२० र एकदिवसीय खेलहरू समावेश हुनेछन् । यो भ्रमण नेपाल र आयरल्यान्डबीचको क्रिकेट सम्बन्धमा कोशेढुङ्गा सावित हुने देखिएको छ ।
आयरल्यान्डले नेपाल भ्रमणका साथै सन् २०२६ मा अन्य धेरै ऐतिहासिक खेलहरू खेल्ने तालिका सार्वजनिक गरेको छ।
• भारतसँगको खेल: जुन महिनाको अन्त्यमा आयरल्यान्डले विश्व विजेता भारतसँग दुई खेलको टी-२० सिरिज खेल्नेछ।
• न्युजिल्यान्डसँग टेस्ट: मे महिनामा आयरल्यान्डले न्युजिल्यान्डसँग ऐतिहासिक टेस्ट म्याच खेल्नेछ।
• अफगानिस्तानसँग सिरिज: अगस्टमा अफगानिस्तानसँग ५ खेलको एकदिवसीय सिरिज घरेलु मैदानमा खेल्नेछ।
• पाकिस्तान भ्रमण: सन् २०२७ को सुरुवातमा आयरल्यान्डले पहिलो पटक पाकिस्तानको ऐतिहासिक भ्रमण गर्ने तालिका छ।
महिला टोलीको व्यस्तता र विश्वकप
यसैगरी आयरल्यान्डको महिला टोलीले पनि सन् २०२६ मा भारत, न्युजिल्यान्ड, पाकिस्तान र वेस्ट इन्डिजसँग घरेलु मैदानमा खेल्नेछ।
साथै, २०२६ मा बेलायतमा हुने महिला टी-२० विश्वकपअघि आयरल्यान्डले वेस्ट इन्डिज र पाकिस्तान सम्मिलित त्रिकोणात्मक सिरिजको आयोजना गर्ने पनि तालिकामा उल्लेख छ ।
आयरल्यान्डको यो नेपाल भ्रमणले नेपाली समर्थकहरूलाई घरेलु मैदानमै एक बलियो टेस्ट राष्ट्रसँग प्रतिस्पर्धा हेर्ने अवसर प्रदान गर्नेछ । यो सिरिजको विस्तृत मिति र खेल तालिका भने भविष्यमा आपसी समझदारीमा तय गरिने क्रिकेट आयरल्यान्डले जनाएको छ ।
