जय ट्रफी इलिट कप बहुदिवसीय राष्ट्रिय क्रिकेट प्रतियोगिताको उपाधि नेपाल पुलिस क्लबले जितेको छ।
बिहीबार माथिल्लो मुलपानी मैदानमा भएको खेलमा त्रिभुवन आर्मी क्लबलाई ४ विकेटले पराजित गर्दै पुलिस च्याम्पियन बनेको हो।
पुलिसले आर्मीले दिएको २२७ रनको लक्ष्य ६ विकेटको क्षतिमा पूरा गर्यो।
पुलिसको जितमा रशिद खानले ८१ रन बनाए। ४ विकेट पनि लिएका खान फाइनलको प्लेयर अफ दि म्याच भए।
पुलिसका लागि चौथो नम्बरमा ब्याटिङ गरेका कुशल भुर्तेलले ५१ रन बनाए भने ओपनर दिनेश खरेलले २५ रन जोड्दा अमृत श्रेष्ठ शून्यमा आउट भएका थिए।
दिलसाद अलीले नटआउट ३१ रन बनाए भने कप्तान आरिफ शेखले १४ रन र शंकर रानाले नटआउट १३ रन बनाए।
बलिङमा आर्मीका पवन कार्की र शाहब आलमले २-२ विकेट लिए।
त्यसअघि तेस्रो दिन आर्मी दोस्रो इनिङग्समा २२६ रनमा अलआउट भएपछि पुलिसले २२७ रनको लक्ष्य पाएको हो। आर्मी दोस्रो दिनको खेल सकिदा १७८-९ को स्थितिमा थियो त्यसपछि दशौं विकेटका लागि ४७ रनको साझेदारी भयो। जसमा सोमपाल कामीले नटआउट २३ रन र आकाश चन्दले ३७ रन बनाए।
आर्मीका लागि दोस्रो इनिङग्समा कुनै पनि ब्याटरले अर्धशतक प्रहार गर्न सकेनन्। कुशल मल्लले ३६ रन बनाए। भीम सार्कीले ३२ रन र शहाब अलामले ३३ रन बनाए।
बलिङमा पुलिसका सागर ढकालले ४ विकेट लिए भने करण केसी र ललितनारायण राजवंशीले ३-३ विकेट लिए।
त्यसअघि पहिलो इनिङग्समा आर्मी र पुलिस दुवैले २२१-२२१ रन जोडेका थिए। आर्मीका लागि इमरान शेखले ५० रन बनाए भने पुलिसका लागि करण केसीले नटआउट ७२ रन जोडेका थिए।
बलिङमा पुलिसका रशिद खानले ४ विकेट लिए भने करण केसी र ललित राजवंशीले ३-३ विकेट लिए। आर्मीका सोमपाल कामीले ५ विकेट हात पारे भने आकाश चन्दको नाममा २ विकेट रह्यो।
