जय ट्रफी इलिट कप बहुदिवसीय राष्ट्रिय क्रिकेट प्रतियोगिताको फाइनल भिडन्तअन्तर्गत दोस्रो दिनको खेल सकिदा नेपाल पुलिस क्लबले खेल नियन्त्रणमा लिएको छ।
माथिल्लो मुलपानी मैदानमा बुधबार दोस्रो दिन दोस्रो इनिङग्स सुरु गरेको आर्मी दिनको खेल सकिदा १७८-९ को स्थितिमा छ। अन्तिम विकेट बाँकी रहेको आर्मीले बनाउने थप रनले पुलिसले पाउने लक्ष्य निर्धाराण गर्नेछ। किनकी पहिलो इनिङग्समा दुवै टोलीले समान रन बनाएका थिए।
आर्मीका लागि दोस्रो इनिङग्समा कुनै पनि ब्याटरले अर्धशतक प्रहार गर्न सकेनन्। आर्मीका लागि सर्वाधिक रन जोडेका कुशल मल्लले ३६ रन बनाए। भीम सार्कीले ३२ रन र शहाब अलामले ३३ रन बनाए। आकाश चन्द १५ रन जोडेर खेलिरहेका छन्।
बलिङमा पुलिसका करण केसी, ललितनारायण राजवंशी र सागर ढकालले ३-३ विकेट लिए।
त्यसअघि पहिलो इनिङग्समा आर्मी र पुलिस दुवैले २२१-२२१ रन जोडेका थिए। आर्मीका लागि इमरान शेखले ५० रन बनाए भने पुलिसका लागि करण केसीले नटआउट ७२ रन जोडेका थिए।
बलिङमा पुलिसका रशिद खानले ४ विकेट लिए भने करण केसी र ललित राजवंशीले ३-३ विकेट लिए। आर्मीका सोमपाल कामीले ५ विकेट हात पारे भने आकाश चन्दको नाममा २ विकेट रह्यो।
