इंग्लिस क्लब चेल्सी र आर्सनलका पूर्व मिडफिल्डर जोर्गिन्हो र अमेरिकी पप गायिका च्यापल रोनबीचको विवाद अहिले सामाजिक सञ्जालमा भाइरल भइरहेको छ। जोर्गिन्होले गायिका रोनका सुरक्षाकर्मीले आफ्नी ११ वर्षीया छोरीलाई रुवाएको आरोप लगाएका छन्।
हाल ब्राजिलको फ्लेमेङ्गो क्लबबाट खेलिरहेका ३४ वर्षीय जोर्गिन्हो आफ्नी श्रीमती र छोरीसँग ब्राजिलको साओ पाउलोस्थित एउटा होटलमा ब्रेकफास्ट खाइरहेका थिए। उनकी छोरी च्यापल रोनकी ठूलो फ्यान हुन् र उनी रोनको कन्सर्ट हेर्नकै लागि त्यहाँ गएकी थिइन्।
जोर्गिन्होका अनुसार, उनकी छोरीले नजिकैको टेबलमा गायिका रोनलाई देखेपछि उनीतिर हेरेर मुस्कुरायन् मात्र। उनले न त गायिकासँग कुरा गरिन्, न त कुनै अवरोध नै पुर्याइन्।
तर, केही बेरमै रोनका एक जना अग्ला सुरक्षाकर्मी उनीहरूको टेबलमा आएर जोर्गिन्होकी श्रीमती र छोरीलाई निकै आक्रामक शैलीमा थर्काउन थाले। सुरक्षाकर्मीले गायिकालाई हैरानी दिएको भन्दै होटलमा उजुरी गर्ने धम्की दिएपछि ११ वर्षीया छोरी निकै डराइन् र धेरै बेरसम्म रोइन्।
जोर्गिन्होले इन्स्टाग्राममा लेख्दै भनेका छन्, ‘फ्यानहरूविना तिम्रो केही अस्तित्व छैन। फ्यानहरूको सम्मान गर्न नजान्ने कलाकार उनीहरूको मायाको लायक हुँदैनन्।’ उनले आफू पनि सार्वजनिक जीवनमा रहेको र सम्मान तथा सीमाका बारेमा जानकार रहेको तर यो व्यवहार निकै निन्दनीय भएको बताएका छन्।
विवाद बढेपछि गायिका रोनले भिडियो सन्देशमार्फत आफ्नो धारणा राखेकी छन्। उनले भनिन्, ‘मलाई ती आमा र छोरीको लागि दुःख लागेको छ, उनीहरूले त्यस्तो व्यवहार पाउनु हुँदैनथ्यो। तर, मलाई त्यो घटनाबारे केही थाहा थिएन। मैले कसैलाई पनि उनीहरूलाई थर्काउन भनेको थिइनँ र ती मेरो व्यक्तिगत सुरक्षाकर्मी पनि होइनन्।’ उनले आफूले बच्चाहरूलाई घृणा नगर्ने पनि स्पष्ट पारिन्।
यो घटनापछि रियो दि जेनेरियोका मेयर एडुआर्डो काभालिएरेले गायिका रोनलाई आफ्नो सहरमा कार्यक्रम गर्न प्रतिबन्ध लगाउने घोषणा गरेका छन्। उनले जोर्गिन्होकी छोरीलाई आगामी मे महिनामा हुने एउटा ठूलो म्युजिक फेस्टिभलमा 'विशेष पाहुना' को रूपमा निमन्त्रणा समेत गरेका छन्।
