राष्ट्रिय खेलकुद परिषद (राखेप) ले अखिल नेपाल फुटबल संघ (एन्फा) को चैत १३ गते झापामा हुन लागेको केन्द्रीय कार्यसमितिको निर्वाचन स्थगित गर्ने निर्देशन दिएको छ।
राखेपका संघ संस्था समन्वय शाखाका प्रमुख चन्द्रकुमार राईले पत्राचार गर्दै एन्फाले सधारण सभामार्फत् गर्न लागेको निर्वाचन स्थगित गरी जानकारी गराउन निर्देशन दिएका हुन्।
निर्वाचनको विषयमा कुनै प्रकारको समन्वय नगरी पुनःनिर्वाचन सम्बन्धी तालिका प्रकाशन गरिएको विभिन्न सामाजिक संजाल मार्फत जानकारी प्राप्त भाएको राखेपको भनाइ छ।
‘साधारण सभा तथा निर्वाचन सम्बन्धि सम्पूर्ण कार्य राष्ट्रिय खेलकुद विकास नियमावली २०७९ को नियम ७ को (ग) अनुसार परिषदको स्वीकृती नभएसम्म स्थगित गर्न राष्ट्रिय खेलकुद विकास ऐन २०७७ को दफा २८ को (ड) वमोजिम निर्देशन गरिएकोमा सो निर्देशन विपरित अटेर र वेवास्ता गरि पुनःनिर्वाचन सम्बन्धी थप तालिका प्रकाशन गरिएको विभिन्न सामाजिक संजाल मार्फत जानकारी प्राम भएकोले परिषदको गम्भिर ध्यानाकर्षण भएको जानकारी गराइन्छ,’ पत्रमा भनिएको छ।
निर्वाचनसम्बन्धी सम्पूर्ण कार्य स्थगित गरी पत्र प्राप्त मितिले ३ (तीन) दिन भित्र राष्ट्रिय खेलकुद परिषदलाई लिखित जानकारी गराउन पनि निर्देशन दिइएको छ।
एन्फाले जिल्लाको निर्वाचन नगरी एकैपटक केन्द्रीय समितिको निर्वाचन गर्न लागेको भन्दै विरोध भइरहेको छ। यस विषयमा उच्च अदालत पाटनमा समेत मुद्दा परेको थियो। तर उच्च अदालतले निर्णय प्रक्रियामा सबै केन्द्रीय सदस्यको सहमति भएको भन्दै निर्वाचन गर्न बाटो खुला गरिदिएको थियो।
तर राखेपले एन्फाको विधान संशोधन नगरी निर्वाचन गर्न नहुने भन्दै स्विकृति दिन अस्वीकार गर्दै आएको छ।
एन्फा निर्वाचनमा हालका अध्यक्ष पंकजबिक्रम नेम्बाङ र उपाध्यक्ष दीर्घबहादुर केसीको प्यानलबीच प्रतिस्पर्धा हुँदैछ। यसका लागि सबै प्रक्रिया पूरा भएर मतदान हुन मात्र बाँकी छ।
