प्रधानमन्त्री कप राष्ट्रिय एकदिवसीय क्रिकेट प्रतियोगितामा सशस्त्र प्रहरी बलको नेपाल एपिएफ क्लब र त्रिभुवन आर्मी क्लबले जित निकालेका छन्।
एपिएफले ओपनर आसिफ शेखको शतकमा बागमती प्रदेशलाई ७१ रनले पराजित गर्यो। माथिल्लो मुलपानी मैदानमा पहिले ब्याटिङ गरेको एपिएफले आसिफको ११४ रनको मद्दतमा २७१ रन बनाए। उसका लागि सन्दीप जोराले ५२ रनको योगदान गरे।
बलिङमा बागमतीका रिजन ढकालले ४ विकेट लिए।
२७२ रनको लक्ष्य पछ्याएको बागमती ४५.१ ओभरमा २०० रनमा अलआउट भयो। उसका लागि विवेक मगरले सर्वाधिक ३४ रन बनाए। बलिङमा एपिएफका कप्तान रोहित पौडेल र अभिषेस गौतमले ३-३ विकेट लिए।
तल्लो मुलपानी मैदानमा ४७ ओभरमा झारिएको खेलमा आर्मीले पुलिसलाई २२ रनले हरायो। पहिले ब्याटिङ गरेको आर्मीले बसिर अहमदको १०० रनको मद्दतमा २४३ रन बनायो। आर्मीका लागि भीम सार्कीले ६२ रन बनाएका थिए। बलिङमा पुलिसका श्रवण यादवले ३ विकेट लिए।
२४४ रनको लक्ष्य पछ्याएको पुलिसले ४५.३ ओभरमा २२१ रनमा अलआउट भयो। उसका लागि रशिद खानले ६० रन र शंकर रानाले ४६ रन बनाए। बलिङमा आर्मीका नरेन साउदले ३ विकेट र आकाश चन्दले ३ विकेट लिए। यससँगै तीन दिनअघि जय ट्रफीको फाइनलमा पुलिससँग ब्यहोरेको हारको आर्मीले बदला लिएको छ।
