आइसिसी पुरुष टी–२० विश्वकप २०२६ अन्तर्गत समूह ‘सी’ को खेलमा इंग्ल्यान्डले स्कटल्यान्डलाई ५ विकेटले पराजित गरेको छ।
इडेन गार्डेन्समा भएको खेलमा स्कटल्यान्डले दिएको १५३ रनको लक्ष्य इंग्ल्यान्डले १८.२ ओभरमा ५ विकेट गुमाएर पूरा गर्यो। यो जितले इंग्ल्यान्डको सुपर ८ यात्राको सम्भावना कायम राखेको छ।
टस जितेर पहिले बलिङ रोजेको इंग्ल्यान्डले स्कटल्यान्डलाई १९.४ ओभरमा १५२ रनमै अलआउट गर्यो। स्कटल्यान्डले पावरप्लेमा ४२ रन बनाउँदा ३ विकेट गुमाइसकेको थियो। रिची बेरिङटनले ३२ बलमा ४९ रनको आक्रामक इनिङ्स खेले पनि टिमलाई ठूलो स्कोरसम्म पुर्याउन सकेनन्। माइकल जोन्सले २० बलमा ३३ र टम ब्रुसले १८ बलमा २४ रन जोडे।
इंग्ल्यान्डको बलिङमा आदिल राशिदले ३ विकेट लिए भने लियाम डसन र जोफ्रा आर्चरले २–२ विकेट बाँडे। आर्चरले यो खेलमा टी–२०आई करियरको ५०औं विकेट पनि पूरा गरे। स्कटल्यान्ड ११३/४ बाट अचानक कोल्याप्स हुँदा १५२ मा समेटियो।
जवाफमा इंग्ल्यान्डको सुरुवात राम्रो भएन। फिल साल्ट र जोस बटलर सस्तैमा आउट भएपछि स्कोर १३/२ पुगेको थियो। त्यसपछि टम ब्यान्टनले अर्धशतकीय इनिङ्स खेले। उनले ४१ बलमा ६३ रन (४ चौका, ३ छक्का) बनाएर नटआउट रहे। ज्याकब बेथेलले ३२ र साम करनले २८ रन जोडे।
इंग्ल्यान्डले १३२/५ को अवस्थाबाट पनि जित हासिल गर्यो।स्कटल्यान्डको बलिङ राम्रो देखिए पनि मुख्य साझेदारी तोड्न नसक्दा हार व्यहोर्नुपर्यो। टम ब्यान्टन प्लेयर अफ द म्याच घोषित भए।
