दिल्लीमा भएको प्रतिस्पर्धात्मक खेलमा आर्यंश शर्मा र सोहैब खानको उत्कृष्ट प्रदर्शनको मद्दतले संयुक्त अरब इमिरेट्स (युएई) ले क्यानडालाई आइसिसी टी-२० विश्वकप २०२६ मा ५ विकेटले हराएको छ।
जुनैद सिद्दीकीको ५ विकेटको मद्दतले क्यानडालाई १५० रनमा रोकेको युएईले १९.४ ओभरमा ५ विकेट गुमाएर लक्ष्य पूरा गर्यो।
लक्ष्य पछ्याउने क्रममा युएईको सुरुवात निकै खराब थियो। एक समय युएई ६६ रनमा ४ विकेट गुमाएर दबाबमा थियो।
तर, आर्यंश शर्मा र सोहैब खानले ८४ रनको महत्वपूर्ण साझेदारी गर्दै टोलीलाई जितको नजिक पुर्याए।
अन्तिम ४ ओभरमा युएईलाई जितका लागि ५६ रन आवश्यक थियो। यस्तो कठिन अवस्थामा सोहैब खानले आक्रामक ब्याटिङ गर्दै खेलको पासा पल्टाए।
उनले डिलन हेलिगर र जस्करनदीप सिंहका ओभरहरूमा लगातार छक्का र चौका प्रहार गरे। सोहैबले मात्र २८ बलमा ५१ रन बनाए। अन्तिम ओभरमा ८ रन चाहिएको बेला आर्यंश शर्माले पहिलो बलमै छक्का प्रहार गरेर जित सुनिश्चित गरे। आर्यंश ७४ रनमा अविजित रहे।
क्यानडाका बायाँ हाते स्पिनर साद बिन जफरले घातक बलिङ गर्दै युएईलाई संकटमा पारेका थिए। उनले ४ ओभरमा मात्र १४ रन दिएर ३ महत्वपूर्ण विकेट लिए।
उनले मयंक कुमार र हर्षित कौशिक जस्ता ब्याटरलाई आउट गरेर क्यानडालाई खेलमा बलियो स्थितिमा पुर्याएका थिए, तर अन्त्यमा सोहैबको विष्फोटक ब्याटिङसामु क्यानडाका बलरहरू टिक्न सकेनन्।
यसअघि टस हारेर पहिले ब्याटिङ गरेको क्यानडाका लागि हर्ष ठाकरले ५० रन र नवनीत धालीवालले ३४ रनको योगदान दिएका थिए। युएईका मध्यम गतिका बलर जुनैद सिद्दीकी क्यानडाका लागि घातक सावित भए।
उनले उत्कृष्ट बलिङ गर्दै ५ विकेट लिए, जुन उनको टी-२० अन्तर्राष्ट्रिय करियरको पहिलो 'फाइभ विकेट हल' (एकै खेलमा ५ विकेट) हो। उनले सुरुवाती ओभरमा विकेट लिनुका साथै अन्तिम ओभरमा पनि क्यानडाका ब्याटरहरूलाई रोकेर राखेका थिए।
यो जित युएईका लागि प्रतियोगितामा दोस्रो जित हो। यसअघि उनीहरूले २०२२ को टी-२० विश्वकपमा नामिबियालाई हराएका थिए।
