टी–२० विश्वकपमा इंग्ल्यान्डविरूद्धको खेल सकेपछि नेपालका समर्थकले सरसफाइ गरेको विषयले चर्चा पाइरहेको छ।
आइतबार मुम्बईको वान्खेडे स्टेडियममा नेपाल इंग्ल्यान्डसँग ५ रनले पराजित भएको थियो।
खेलपछि अधिकांश समर्थकहरू स्टेडियमबाट बाहिरिँदै थिए। तर केही नेपाली समर्थकहरू त्यहाँ रहेका फोहोर टिप्न थालेका थिए।
ती समर्थकले भुइँमा रहेका कागज, प्लास्टिक, कप लगायत फोहोर टिपेका थिए। यसरी सफाइ गरिरहेको भिडिओ सामाजिक सञ्जालमा चर्चामा छ।
यही विषयलाई भारतीय समाचार संस्था इन्डिया टुडेले समाचार नै बनाएको छ।
सामाजिक सञ्जाल प्रयोगकर्ताहरूले पनि यसको तारिफ गरिरहेका छन्।
नेपाली फ्यानले सरसफाइ गरी मन जितेको र पाठ सिकाएको पनि सामाजिक सञ्जाल प्रयोगकर्ताले भिडिओमा टिप्पणी गरेका छन्।
यसो त नेपाली समर्थकहरूले काठमाडौंकै त्रिजि मैदानमा पनि खेल सकेपछि सरसफाइ गर्दै आएका छन्।
