अमेरिकी राष्ट्रपति डोनाल्ड ट्रम्पले ४८ घन्टाभित्र 'स्ट्रेट अफ हर्मुज' खोल्न चेतावनी दिए पछि इरानले मध्यपूर्वका पूर्वाधारमा प्रहार गर्ने धम्की दिएको छ।
शनिबार सामाजिक सञ्जालमा एक पोस्ट गर्दै ४८ घण्टाभित्र इरानले 'स्ट्रेट अफ हर्मुज' नखोले इरानका ऊर्जा केन्द्रहरूमा प्रहार गर्ने धम्की दिएका थिए। सबैभन्दा ठूलोबाट ऊर्जा केन्द्रहरूबाट सुरू गर्दै प्राय सबै नष्ट गर्ने ट्रम्पले बताएका थिए।
त्यसको जबाफमा ट्रम्पले इरानका ऊर्जा केन्द्रहरूमा प्रहार गरे मध्यपूर्वका सबैखाले पूर्वाधारमा आक्रमण गर्ने इरानले धम्की दिएको छ।
‘अघिल्ला चेतावनीहरूलाई निरन्तरता दिँदै, यदी शत्रूले इरानको इन्धन र ऊर्जा पूर्वाधारमा आक्रमण गरेमा, यस क्षेत्रमा रहेका देशका र अमेरिकाका सम्पूर्ण ऊर्जा, सूचना प्रविधि, र समुद्री पानी सफा गर्ने पूर्वाधारहरूलाई निशाना बनाइनेछ,’ इरानको सैन्य परिचालन कमान्डले आइतबार विज्ञप्ति जारी गर्दै चेतावनी दिएको छ।
इरानले आफ्नो नजिकै रहेको साँघुरो समुद्री मार्ग 'स्ट्रेट अफ हर्मुज' बन्द गरेको छ।
यो जलमार्ग प्रयोग गरेर विश्वको करिब २५ प्रतिशत कच्चा तेल र करिब २० प्रतिशत ग्यास पैठारी हुन्छ। त्यो बन्द हुँदा तेल आपूर्ति कम भएर अन्तर्राष्ट्रिय बजारमा तेलको भाउ बढेको छ। फलस्वरूप विश्व अर्थतन्त्रमा नै नराम्रो प्रभाव परेको छ।
त्यसैले ट्रम्पले हर्मुज खुलाउने प्रयास गरिरहेका छन्। सोही प्रयास अनुरूप उनले इरानलाई हर्मुज खोल्न ४८ घण्टे म्याद दिएका छन्। इरानले त्यसको जबाफमा मध्यूर्वका पूर्वाधारमा प्रहार गर्ने धम्की दिएको हो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
