नेपाली कांग्रेसले फागुन २१ को प्रतिनिधि सभा निर्वाचनमा कम्तीमा २१ ठाउँमा अन्तर्घात भएको पाइएको बताएको छ।
पार्टी भित्रकै अन्तर्घातका कारण ती २१ क्षेत्रमा पराजय भोगेको निष्कर्ष निस्किएको प्रवक्ता देवराज चालिसेले जानकारी दिए।
कांग्रेसको केन्द्रीय समितिको बैठकले उक्त निष्कर्ष निकालेको उनको भनाइ छ।
प्रवक्ता चालिसेले ५ देखि ३ हजारभन्दा कम मतान्तरले हारिएका क्षेत्रहरूमा मुख्यतः आन्तरिक कारण जिम्मेवार रहेको देखिएको बताए।
३ हजारदेखि ५ हजारसम्मको मतान्तरले हार भएका क्षेत्रहरूमा आन्तरिक मतभिन्नतासँगै निर्वाचन अभियानमै कमजोरी भएको उनले बताए।
५ हजारदेखि १० हजारसम्मको ठूलो मतान्तरमा पराजित भएका क्षेत्रमा भने अन्तर्घात, कमजोर चुनावी क्याम्पेन र प्रतिकूल ‘न्यारेटिभ’ले पार्टीलाई रक्षात्मक बनाएको उनले बताए।
त्यसलाई प्रभावकारी रूपमा सामना गर्न नसकिएको कारण पराजय व्यहोर्नुपरेको उनको भनाइ छ। केही क्षेत्रमा संगठनात्मक कमजोरी मात्र नभई मतदाताको कांग्रेसलाई गर्ने विश्वासमै कमी आएको देखिएको उनले बताए।
उनले ८ लाख ५० हजारभन्दा बढी क्रियाशील सदस्य भएको कांग्रेसले अपेक्षित मत पाउन नसक्नु पनि गम्भीर प्रश्न बनेको बताए। उनले पार्टीको सदस्यता विस्तार हुँदै जाने तर मत भने घट्दै जानु चिन्ताजनक भएको बताए।
उनले सभापति गगन थापाले दिएको राजीनामा फिर्ता गर्नुपर्ने पक्षमा शतप्रतिशत केन्द्रीय सदस्यहरू एकमत रहेको पनि बताए।
बैठक निर्वाचन समीक्षा र सभापतिको राजीनामासम्बन्धी दुई विषयमा छलफल केन्द्रित छ।
– न्युज एजेन्सी नेपाल
