काठमाडौंको निर्वाचन क्षेत्र नम्बर १० मा भर्खरै मतगणना सुरू भएको छ।
सर्वदलीय सहमतिपछि दक्षिणकाली नगरपालिका वडा नम्बर १ बाट मतगणना सुरू गरिएको निर्वाचन अधिकृत अमृताकुमारी शर्माले जानकारी दिइन्।
त्रिभुवन विश्वविद्यालयको स्मृति भवनमा सुरू भएको मतगणनाको नतिजा प्रत्येक वडाको गणना सकिएपछि सार्वजनिक गरिने उनले बताइन्।
काठमाडौं–१० मा अहिले २५ जना उम्मेदवार प्रतिस्पर्धामा छन्। तीमध्ये १५ जना दलका तर्फबाट उम्मेदवार छन् भने १० जना स्वतन्त्र उम्मेदवारका रूपमा मैदानमा छन्।
यहाँ नेपाली कांग्रेसले हिमाल कार्कीलाई अघि सारेको छ। नेपाल विद्यार्थी संघ हुँदै राजनीतिमा सक्रिय कार्की रियल स्टेट व्यवसायी हुन्। अहिले उनी जिल्ला कार्यसमिति सदस्य छन्। उनी यसअघि कीर्तिपुर नगरपालिकाको उपनिर्वाचनमा मेयर पदका दाबेदार थिए। उनी २०५४ सालमा वडाध्यक्ष निर्वाचित भएका थिए।
एमालेले मजदुर नेता विनोद श्रेष्ठलाई उम्मेदवार बनाएको छ। मजदुर आन्दोलनबाटै पार्टी मूलधारको राजनीतिमा प्रविष्ट श्रेष्ठ एमाले निकट ट्रेड युनियन महासंघका अध्यक्ष पनि हुन्। जिफन्ट आन्दोलनमा आबद्ध रहँदै आएका उनी दक्षिण एसियाली ट्रेड युनियन महासंघका उपाध्यक्ष पनि हुन्।
नेपाली कम्युनिस्ट पार्टी (नेकपा) ले रूपा महर्जनलाई उम्मेदवार बनाएको छ। उनी सशस्त्र विद्रोहदेखि नै पार्टीका सक्रिय अनुहार हुन्। उनका पति सुचेन्द्र श्रेष्ठ युद्धकालमा बेपत्ता भएका थिए। हालसम्म खोजखबरविहीन छन्। सुचेन्द्र २०६० कात्तिक २१ गते काठमाडौंको असनबाट बेपत्ता भएका थिए। रूपाका पिता पनि राजनीतिमा सक्रिय छन्। गत प्रदेश सभामा निर्वाचनमा उनी काठमाडौं १० (१) मा माओवादी केन्द्रका तर्फबाट उम्मेदवार भई पराजित भएका थिए।
पिताकै प्रेरणा पछ्याउँदै राजनीतिमा सक्रिय भएकी चन्द्रागिरि नगरपालिकाकी महर्जनलाई नेकपाले प्रतिस्पर्धीका रूपमा मैदानमा उतारेको हो। उनी पूर्वसभासद पनि हुन्।
राष्ट्रिय स्वतन्त्र पार्टी (रास्वपा) ले जिल्ला सभापति प्रदीप विष्टलाई उम्मेदवार बनाएको छ। कांग्रेस पृष्ठभूमिका विष्ट यसअघि पनि काठमाडौं–१० मा उम्मेदवार थिए। उनी त्यति बेला तेस्रो भएका थिए।
केही समयअघि जिल्ला सभापतिको जिम्मेवारीबाट राजीनामा दिएर पार्टी सदस्यको हैसियतमा मात्र बस्न खोजेका विष्ट नेतृत्वसँगको सल्लाहपछि भूमिकामा फर्किएका थिए। पछिल्लो समय पार्टीको प्रभाव विस्तार भएकाले त्यसलाई जितको तहसम्म पुर्याउने योजनामा देखिन्छन्।
यहाँ राष्ट्रिय प्रजातन्त्र पार्टीले दक्षिणकालीको थल्खुका बलराम थापालाई उम्मेदवार बनाएको छ। त्यस्तै, जसपा नेपालले बाराका भागरीत साह, नेमकिपाले पांगाकी वृन्दा महर्जनलाई उम्मेदवार बनाएको छ।
