अमेरिकाले भेनेजुएलामा सैन्य हमला गरी राष्ट्रपति निकोलस मदुरो र उनकी श्रीमती सिलिया फ्लोरेसलाई पक्राउ गरेको विषयमा विश्वका विभिन्न देशहरूले प्रतिक्रिया जनाएका छन्।
मदुरोमाथि लागुऔषध तस्करी र आतंकवाद सम्बन्धी अभियोग लगाइएको छ। उनलाई आइतबार म्यानहटनस्थित संघीय अदालतमा उपस्थित गराइने तयारी छ।
मदुरोलाई हतकडी लगाएर शनिबार अबेर न्युयोर्क सिटी ल्याइएको थियो। उनलाई अब ब्रुकलिनस्थित मेट्रोपोलिटियन डिटेन्सन सेन्टरमा राखिनेछ।
उनलाई पक्राउ गरिएको विरोधमा अमेरिकामा पनि प्रदर्शन भएको थियो।
शनिबार बोस्टन र मिनियापोलिसका केही सहरहरूमा 'तेलका लागि युद्ध बन्द गर्न' माग गर्दै मानिसहरूले प्रदर्शन गरेका थिए।
अमेरिकाको कदमप्रति प्रतिस्पर्धी देशहरूले निन्दा गरेका छन् भने सहयोगी राष्ट्रहरुले स्वागत गरेका छन्।
घटनापछि रूसी विदेश मन्त्रालयले विज्ञप्ती जारी गरी भेनेजुएलामा अमेरिकी हमलाको निन्दा गरेको छ।
'यो गहिरो चिन्ताजनक र निन्दनीय छ। यस्ता कार्यहरूलाई औचित्य दिन प्रयोग गरिएका बहानाहरू निराधार छन्,' रूसी विदेश मन्त्रालयले भनेको छ।
उसले संवादमार्फत समाधान खोज्न र मदुरो र उनकी पत्नीलाई रिहा गरिनुपर्ने बताएका छन्।
चीनले अमेरिकाको कदमलाई अन्तर्राष्ट्रिय कानुनको उल्लंघन र एउटा सार्वभौम राष्ट्र विरूद्ध गरिएको बल प्रयोग भन्दै कडा निन्दा गरेको छ। अमेरिकाको यस्तो कमदले ल्याटिन अमेरिकामा र क्यारेबियनमा शान्ति तथा सुरक्षा खतरा बढ्ने चेतावनी दिएको छ।
इरानले पनि अमेरिकाले गरेको सैन्य आक्रमणलाई राष्ट्रिय सार्वभौम र क्षेत्रीय अखण्डताको खुल्ला उल्लंघन भन्दै निन्दा गरेको छ।
क्युबाले अमेरिकी हमलाको निन्दा गर्दै अन्तर्राष्ट्रिय समुदायलाई यसमा प्रतिक्रिया दिन आह्वान गरेको छ।
जर्मनीका चान्सलर फ्रेडरिक मर्जले अमेरिकी अपरेसनको कानुनी मूल्यांकन जटिल रहेको भन्दै यसबारे समय लिएर अध्ययन गरिने बताए। उनले अन्तर्राष्ट्रिय कानुनका सिद्धान्त लागू हुनुपर्ने जोड दिँदै भेनेजुएलामा निर्वाचनबाट वैध सरकारमा संक्रमण सुनिश्चित हुनुपर्ने र राजनीतिक अस्थिरता नआउनुपर्ने चेतावनी दिए।
प्रधानमन्त्री पेद्रो सान्चेजले मादुरो शासनलाई स्पेनले मान्यता नदिएको स्पष्ट गर्दै अन्तर्राष्ट्रिय कानुन उल्लङ्घन गर्ने कुनै पनि हस्तक्षेप स्वीकार्य नहुने बताएका छन्। यस्तो कदमले क्षेत्रलाई अनिश्चितता र द्वन्द्वतर्फ धकेल्ने उनको भनाइ छ।
इसराइली प्रधानमन्त्री बेन्जामिन नेतन्याहूले अमेरिकी राष्ट्रपति डोनाल्ड ट्रम्पलाई बधाई दिँदै यसलाई स्वतन्त्रता र न्यायका पक्षमा ‘साहसी र ऐतिहासिक नेतृत्व’ भनेका छन्।
दक्षिण अफ्रिकाले संयुक्त राष्ट्र सुरक्षा परिषद्लाई तत्काल बैठक बोलाउन आग्रह गर्दै अन्तर्राष्ट्रिय शान्ति र सुरक्षामा गम्भीर असर पर्न सक्ने चेतावनी दिएको छ।
अर्जेन्टिनाका राष्ट्रपति हाभिएर मिलेईले यसलाई चुनाव धाँधली गर्ने तानाशाही शासनको पतन भन्दै ‘स्वतन्त्र विश्वका लागि उत्कृष्ट खबर’ भनेका छन्।
मेक्सिकोकी विदेश मन्त्रालयले संयुक्त राष्ट्र चार्टरको धारा २ उल्लंघन भएको भन्दै अमेरिकी सैन्य कारबाहीको कडा निन्दा गरेको छ।
क्यानडाकी विदेशमन्त्री अनिता आनन्दले सबै पक्षलाई अन्तर्राष्ट्रिय कानुनको सम्मान गर्न आह्वान गर्दै भेनेजुएलाली जनताको शान्तिपूर्ण र लोकतान्त्रिक आकांक्षामा क्यानडा साथमा रहेको बताइन्।
ब्राजिलका राष्ट्रपति लुइज इनासियो लुला दा सिल्भाले बमबारी र राष्ट्रपति पक्राउ अस्वीकार्य सीमा नाघेको भन्दै यसलाई सार्वभौमसत्तामाथिको गम्भीर आघात भनेका छन्।
बेलायतका प्रधानमन्त्री किअर स्टार्मरले बेलायत यस कारबाहीमा संलग्न नरहेको स्पष्ट गर्दै तथ्य बुझेर मात्र प्रतिक्रिया दिने र अन्तर्राष्ट्रिय कानुन पालना हुनुपर्ने बताए।
युरोपेली आयोगका अध्यक्ष उर्सुला भोन डेर लेयेनले भेनेजुएलाली जनताको पक्षमा उभिने र समाधान शान्तिपूर्ण तथा कानुनसम्मत हुनुपर्ने बताइन्।
चिली, उरुग्वे, बोलिभिया, कोलम्बिया, पेरु, नर्वे, डेनमार्क, स्लोभाकिया, चेक गणराज्यलगायतले सैन्य हस्तक्षेपको विरोध गर्दै कूटनीतिक संवाद र लोकतान्त्रिक संक्रमणको आह्वान गरेका छन्।
ईरान, बेलारुस र निकारागुवाले अमेरिकी कदमलाई सार्वभौमसत्ता उल्लङ्घन भन्दै कडा शब्दमा निन्दा गरेका छन्।
युक्रेनले भने मादुरो शासन मानवअधिकार उल्लङ्घनमा दोषी रहेको उल्लेख गर्दै लोकतान्त्रिक मूल्यअनुसारको समाधान हुनुपर्ने प्रतिक्रिया दिएको छ।
