रूपन्देहीको सुप्रिम सहकारी संस्था पीडितहरूले सहकारी संस्थामा बचत गरेको रकम फिर्ता गरिदिन माग गरेका छन्।
फागुन २१ गते हुन गइरहेको प्रतिनिधिसभा निर्वाचनका लागि चुनावी घरदैलो अभियानमा रहेका रूपन्देही क्षेत्र नं. ३ मा नेकपा एमालेका उम्मेदवार वासुदेव घिमिरेसँग सुप्रिम सहकारी पीडितहरूले आफ्ना समस्या समाधान गरिदिन आग्रह गरेका हुन्।
सिद्धार्थनगर नगरपालिका वडा नं. ८ मा घरदैलो कार्यक्रममा पुगेका घिमिरेलाई भेटेर सहकारी पीडित संघर्ष समितिका सल्लाहकार डा. शान्तराम शर्माले सहकारीमा बचत गरेको रकम फिर्ताको लागि पहल गर्न आग्रह गरेका हुन्।
सुप्रिम सहकारीका झन्डै १० हजार बचतकर्ताहरूको १ अर्ब तीन करोड रकम हिनामिना हुँदा दुखजिलो गरेर बचत गरेका बचतकर्ता चरम आर्थिक संकटमा परेको गुनासो सुनाएका थिए।
संघर्ष समितिका पदाधिकारीहरू सहित घिमिरेलाई भेट गर्न पुगेका शर्माले पीडितहरूले सहकारीमा राखेको रकम नै जीवनभरको कमाइ भएको बताउँदै छिटोभन्दा छिटो बचत रकम फिर्ताको व्यवस्था मिलाउन राजनीतिक नेतृत्वले पहल गर्नुपर्ने माग गरेका थिए।
जबाफमा उम्मेदवार घिमिरेले सहकारी पीडितको समस्या गम्भीर भएको उल्लेख गर्दै आफू निर्वाचित भए कानुनी र नीतिगत पहलमार्फत समाधानका लागि आवाज उठाउने प्रतिबद्धता व्यक्त गरे। उनले सहकारी क्षेत्रलाई व्यवस्थित र पारदर्शी बनाउन कडाइका साथ नियमन आवश्यक रहेको धारणा व्यक्त गरे।
घरदैलो कार्यक्रममा स्थानीय बासिन्दाले विकास निर्माण, रोजगारी, साना व्यवसाय तथा सुशासनका विषयमा समेत उम्मेदवार घिमिरेको ध्यानाकर्षण गराएका थिए।
