बुटवल उपमहानगरपालिकाले मगर दिवसका अवसरमा सार्वजनिक बिदा दिने निर्णय गरेको छ।
यस वर्षको मगर दिवस यही फागुन १५ गते शुक्रवार परेको छ।
उपमहानगरपालिकाले सूचना जारी गर्दै बुटवलमा मगर समुदायको बाक्लो बसोबास रहेकोले दिवसको अवसरमा फागुन १५ गते एक दिनको लागि सार्वजनिक बिदा दिने निर्णय गरिएको जनाएको छ।
उपमहानगरपालिकाका प्रमुख खेलराज पाण्डेले बुधबार सूचना जारी गर्दै नगर कार्यपालिकाको कार्यालय, मातहतका सबै वडा कार्यालय, स्वास्थ्य संस्था, सम्पूर्ण शैक्षिक संस्था तथा सार्वजनिक संघ संस्थामा फागुन १५ गते स्थानीय बिदा दिने निर्णय गरिएको जनाएका हुन्।
मगर समुदायको पहिचान, संस्कृति र योगदानको सम्मान स्वरूप एक दिन स्थानीय बिदा दिने निर्णय गरिएको नगरप्रमुख पाण्डेले बताएका हुन्।
त्यस्तै गुल्मीका पाँच वटा स्थानीय तहहरूले पनि मगर दिवसको दिन फागुन १५ गते सार्वजनिक बिदा दिने निर्णय गरेका छन्।
जिल्लामा मगर समुदायको बाहुल्यता रहेका सत्यवती, गुल्मी दरबार, रुरुक्षेत्र, काली गण्डकी र मालिका गाउँपालिकाले छुट्टाछुट्टै रूपमा सूचना जारी गर्दै मगर दिवसको सार्वजनिक बिदा दिने निर्णय गरेका हुन्।
