नेपाली कांग्रेसका नेता शेखर कोइरालाको सचिवालयले प्रतिनिधि सभा निर्वाचनका लागि पार्टीले कुन मापदण्डमा रहेर कहाँ बसेर टिकट बाँडेको थाहा नभएको बताएको छ।
कोइरालाको सचिवालयबाट पठाइएको जानकारीमा भनिएको छ, ‘देशैभरबाट टिकट माग्न आउने नेताहरूको भिड लागेको छ तर कहाँ बसेर कसरी र कुन मापदण्डमा टिकट बाँडिदैछ त्यसको अहिलेसम्म कुनै जानकारी छैन।’
सभापति गगन थापा र नेता कोइराला मिलेर जाने समाचारमा सत्यता नरहेको पनि कोइरालाको सचिवालयको भनाइ छ।
कोइरालाले हिजो बत्तिसपुतलीमा राखेको भेलामा पुगेका नेता सुनिल शर्माले 'गगन र शेखर मिलेर जाने सहमति भइसकेको' बताएका थिए।
‘जहाँसम्म शेखर कोइराला र गगन थापासँग मिलेर जाने भन्ने कुरा समाचारमा आइरहेको छ, त्यसमा सत्यता छैन। आजसम्म विशेष महाधिवेशनबाटआएको केन्द्रीय समितिका कसैले पनि कुनै पनि माध्यमबाट कोइरालासँग सम्पर्क र कुराकानी गर्नुभएको छैन,’ सचिवालयले भनेको छ।
कांग्रेसले पदाधिकारीहरू रहेको संसदीय बोर्ड बनाएर टिकट बाँड्न थालेको छ।
साथै टिकट वितरण गर्नुअघि संस्थापन पक्षले हिजो र आज निवर्तमान सभापति शेरबहादुर देउवा र नेता कोइरालानिकट नेताहरूसँग संवाद गरेको थियो।
