दाङको निर्वाचन क्षेत्र नं. ३ अन्तर्गतको बबई गाउँपालिका– १ को केही मतदान केन्द्रमा अझै मतदान सुरु भएको छैन।
वडाध्यक्ष प्रेमबहादुर डाँगीका अनुसार बबई– १ को गंगटे, भाङोबारीमा भने मतदान सुरु भएको छ। तर, वडा नं. १ को जिलामा भने मतदान सुरु हुन सकेको छैन।
दाङ क्षेत्र नं. ३ का निर्वाचन अधिकृत चन्द्रबहादुर सिंजालीका अनुसार वडा नं. १ को जिला मतदान केन्द्रमा ८८२ मतदाता छन्।
निर्वाचन अधिकृत सिंजालीले बबई– ७ मलैमा पनि हालसम्म मतदान सुरु हुन नसकेको बताए। यहाँ ५३० जना मतदाता छन्।
‘अहिले पनि छलफल जारी छ,’ सिंजालीले भने, ‘स्थानीय दलका प्रतिनिधि र सर्वसाधारणलाई सम्झाइ बुझाइ गर्ने प्रयास भइ रहेको छ।’
उनीहरुले बुधबार पनि मतदान गराउन खटिएका कर्मचारीसँग छलफल तथा समन्वय गर्न मानेका थिएनन्।
‘हाम्रो तर्फबाट सबै तयारी पुरा छ,’ निर्वाचन अधिकृत सिंजालीले भने,‘ हाम्रा कर्मचारी मतपेटिका कुरेर बस्नु भएको छ तर अहिलेसम्म २ वडामा मतदान हुन सकेको छैन।'
यो क्षेत्र बाँके राष्ट्रिय निकुञ्जको मध्यवर्ती क्षेत्र हो। वन्यजन्तु र मानिस बीचको बढ्दो द्वन्द्वका कारण स्थानीयले पुर्नर्बास अर्थात बस्ति स्थान्तरणको माग गर्दै आएका छन्।
यहाँका स्थानीय मतदाताले जस्ले आफूहरुलाई बन्य जन्तुबाट सुरक्षित वा अन्यत्र स्थान्तरण गर्न भूमिका खेल्छ उसैलाई मात्रै मत दिने र अन्यथा मतदानमै सहभागी नहुने बताउँदै आएका छन्।
तर, स्थानीय चन्द्रबहादुर राँगु मगरले भने आफू लेखबाट मतदान केन्द्रतिर झर्दै गरेको बताए।
‘हामी साथी भाइ लेखबाट मतदान केन्द्र भएको ठाउँतिर झर्दै छौं,’ उनले भने ‘ हामी तल झरेर सबैलाई संझाइ बुझाइ गर्ने छौं। मतदान गर्नका लागि आग्रह गर्ने छौं।’
वन्य जन्तु प्रभावित स्थानीयले ‘नो– भोट’ भन्दै आएका छन्।
नेपाली कांग्रेसका उम्मेदवार दीपक गिरीले यहाँका स्थानीय मतदातालाई भेटेर वाचा पत्र जारी गर्दै निर्वाचित भए सदन मार्फत कुरा उठाएर बस्ती स्थान्तरणका लागि भूमिका खेल्ने प्रतिबद्धता जाहेर गरेका थिए।
केही स्थानीयले समानुपातिक तर्फको मतदान गर्न सकिने बताएका छन्।
