नेपाली कांग्रेसले सभापति गगन थापालाई प्रधानमन्त्रीको उम्मेदवार घोषणा गरेको छ।
शुक्रबार बसेको कांग्रेस केन्द्रीय कार्यसमिति बैठकले सभापति थापालाई उम्मेदवार बनाएर चुनावमा जाने निर्णय गरेको हो।
केन्द्रीय कार्यसमिति बैठकमा उपसभापति विश्वप्रकाश शर्माले उक्त प्रस्ताव राखेका थिए।
बैठकपछि पत्रकारहरूसँग कुराकानी गर्दै प्रस्ताव पारित भएको उपसभापति शर्माले बताएका छन्।
उनले बैठकमा सभापति थापालाई प्रधानमन्त्री घोषणा गरेर चुनावमा जानुपर्नेमा सात वटा कारण समेत प्रस्तुत गरेका थिए।
उनले यसलाई विशिष्ट परिस्थितिको माग भनेका छन्।
'सामान्यतया निर्वाचनपछि मात्रै प्रधानमन्त्री पदका लागि व्यक्ति अघिसार्ने प्रचलन रहि आएको हो तर नेपाली काँग्रेसले चुनाव अभियान क्रममै आफ्नो उम्मेदवार प्रस्तुतगर्ने तयारी गर्नुको अर्थ मुलुकको विशिष्ट परिस्थितिको मागलाई सहि ढंगले सम्बोधन गर्ने जमर्को हो,' उनले प्रस्तावमा भनेका छन्।
प्रधानमन्त्रीको उम्मेदवार घोषणापछि मतदातालाई भोलिको अन्योलताबाट मुक्ति मिल्ने पनि उनको प्रस्तावमा उल्लेख छ।
उपसभापित शर्माले जेनजी आन्दोलनपछिको परिवर्तनलाई आत्मसात गरी उनीहरुको मुद्दालाई स्वामित्व लिएर मुलुकमा सुशासन स्थापित गर्ने संकल्प र योजना पार्टीको विशेष महाधिवेशनले लिएको बताएका छन्।
गगन थापाले परिवर्तित समय र स्वरलाई `डाइनामिक ढंगले´ नेतृत्व गर्नसक्ने विश्वास कांग्रेसले लिएको उनले बताएका छन्।
चौथो कारणमा प्रधानमन्त्रीमा खोजिने परिपक्वता गगन थापामा रहेको उपसभापति शर्माले बैठकमा राखेका छन्।
'जुझारु बिद्रोही छवि मात्रै होइन, प्रतिकुल समयमा संयम राखेर विषयवस्तुलाई परिपक्व ढंगले हल गर्नसक्ने क्षमता पनि छ गगन थापासँग। उत्तेजना र आवेगको राजनीति न त सुसंस्कृत हो न दिर्घजिवी। देशको प्रधानमन्त्री बन्ने व्यक्तित्वले त झनै आवेगलाई होइन, संयम भाव र सौम्य प्रवृत्तिलाई अघि लगाउनुपर्ने हुन्छ l त्यो सामर्थ्य राख्ने व्यक्तित्व हामीले प्रधानमन्त्री पदका लागि सर्वाधिक उपयुक्त भनेर अघि सारेका छौं,' उपसभापति शर्माले राखेको प्रस्तावमा भनिएको छ।
साथै सभापति थापा विगतको लोकतान्त्रिक संघर्षमा सबल र ततपस्चातको सत्तामा अब्बल प्रमाणित भएको दाबी उनले गरेका छन्।
