नेपाली कम्युनिस्ट पार्टी (नेकपा) का नेता हरिबोल गजुरेलले सिन्धुली–२ बाट उम्मेदवार बनेका महेश्वर दाहालको उम्मेदवारी फिर्ता नहुने बताएका छन्।
शुक्रबार सेतोपाटीसँग कुराकानी गर्दै नेता गजुरेलले दाहाल नै पार्टीको आधिकारिक उम्मेदवार भएकाले उम्मेदवारी फिर्ता नगरेको बताएका हुन्।
पार्टी केन्द्रले गजुरेललाई निर्देशनपत्र पठाउँदै उम्मेदवारी फिर्ता लिन भनेको थियो।
गजुरेलले दाहाल जिल्लाबाट सिफारिस भएकाले उम्मेदवारी फिर्ता नगरिएको भनेका छन्। बरू उनैलाई जिताउन कुनै कसर बाँकी नराख्ने उनले बताएका छन्।
‘जिल्ला पार्टीको अध्यक्ष नै त्यसको समर्थक हुनुहुन्छ। म नै त्यसको प्रस्तावक छु र चुनावको कमान्ड जिल्ला कार्यसमितिको संयोजकले गरिरहनु भएको छ,’ गजुरेलले भने।
जिल्लाको सिफारिसलाई केन्द्रले लत्याएकाले सबक सिकाउन दाहालको उम्मेदवारी कायम राखिएको उनले बताए।
‘जिल्लाको सिफारिस केन्द्रले अटेर गर्यो। बलमिच्याइँ पनि गर्यो। त्यसको सबक सिकाउन पनि हामीले प्रतिवाद गर्यौं। पार्टीभित्रको स्वेच्छाचारी प्रवृत्तिविरूद्ध सन्देश दिएका छौं,’ उनले भने।
पार्टीभित्र झाँगिएको परिवारवादलाई सिन्धुलीमा निस्तेज गर्न खोजिएको उनले बताए।
पार्टी केन्द्रले लेखनाथ दाहाललाई उम्मेदवार बनाएको थियो।
पार्टीको आधिकारिक उम्मेदवारविरूद्ध बागी उम्मेदवार खडा गरिएको भनेर फिर्ता गर्न संयोजक प्रचण्ड र सह-संयोजक माधव नेपालले निर्देशन दिएको थियो।
‘नेपाली कम्युनिष्ट पार्टीको तर्फबाट आगामी २०८२ साल फागुन २१ गते हुन गइरहेको प्रतिनिधिसभा सदस्यको प्रत्यक्ष तर्फको निर्वाचनमा यस दलको तर्फबाट सिन्धुली जिल्ला क्षेत्र नम्बर २ को पार्टीको तर्फबाट आधिकारीक उम्मेदवारका विरुद्धमा यस दलका केन्द्रीय सदस्य महेश्वर दाहालले अनधिकृत रूपमा सोही निर्वाचन क्षेत्रमा (बागी) उम्मेदवार मनोनयन दर्ता गरी अनाधिकृत उम्मेदवारी दिएको निर्वाचन आयोगद्वारा प्रकाशित प्रत्यक्षतर्फको उम्मेदवारको नामावली सूचीबाट अवगत भएको छ,’ नेकपा संयोजक अध्यक्ष पुष्पकमल दाहाल ‘प्रचण्ड’ र सहसंयोजक माधवकुमार नेपालले पठाएको निर्देशनमा भनिएको थियो।
