नेपाली कांग्रेस केन्द्रीय कार्यसम्पादन समितिको बैठकले २०८३ वैशाख २८, २९, ३० र ३१ गते नियमित महाधिवेशन गर्ने गरी नयाँ कार्यतालिका प्रस्ताव पारित गरेको छ।
कांग्रेस प्रवक्ता प्रकाशशरण महतले कार्यसम्पादन समिति बैठकबाट संशोधित कार्यतालिका पास भएको जानकारी दिए।
बैठकपछि सञ्चारकर्मीहरूसँग कुरा गर्दै प्रवक्ता महतले भने, 'पुसमा प्रस्तावित महाधिवेशन त्यही मितिमा गर्न सम्भव नभएपछि संशोधित कार्यतालिका पास गरेको छ, जसअनुसार वैशाख २८, २९, ३० र ३१ गते नियमित महाधिवेशन हुनेछ।'
यो कार्यतालिका अनुसार चैत २१ गतेदेखि नै अधिवेशन प्रारम्भ हुने उनले बताए।
बैठकमा कार्यवाहक सभापति पूर्णबहादुर खड्काले वैशाख मसान्तमा १५ औं महाधिवेशन गर्ने गरी प्रस्ताव प्रस्तुत गरेका थिए।
कार्यतालिकाअनुसार आगामी चैत २१ गते गाउँ नगर अधिवेशन तय गरिएको छ। त्यस्तै, चैत २५ गते गाउँ नगरपालिका अधिवेशन हुनेछ।
चैत २८ गते प्रदेश सभा क्षेत्रीय अधिवेशन तय गरिएको छ भने वैशाख २ गते एक मात्र प्रतिनिधि सभा निर्वाचन क्षेत्र र वैशाख ५ गते दुई वा त्यसभन्दा बढी प्रतिनिधि सभा निर्वाचन क्षेत्र भएको जिल्लाको अधिवेशन हुनेछ।
आगामी वैशाख १० देखि १२ गतेसम्म प्रदेश अधिवेशन गर्ने र वैशाख मसान्तभित्र केन्द्रीय अधिवेशन गर्ने कार्यतालिकामा उल्लेख छ।
-ink-1767354349.jpeg)
